Aitortza iraunkortasunarekin dugun konpromisoari
Itsas-museumean egin zien Eusko Jaurlaritzak aitortza-ekitaldia EMAS ingurumena kudeatzeko Europako sisteman erregistratutako euskal erakunde eta enpresei.
Kudeaketarekin eta eguneroko lanarekin ekonomikoki aurrera egitea eta planeta eta ingurunea zaintzea uztargarriak direla erakutsiz, Metro Bilbaori aitortza hori egin zioten. Bulego tekniko eta obretakoaren buru Juan Carlos Mendoza gure lankide eta ordezkariak jaso zuen.
«Iraunkortasunean egiten diren inbertsioek ingurumena babesteaz gain enplegua sortu eta berrikuntza sustatzen dute», esan zuen Ekonomiaren Garapen, Jasangarritasun eta Ingurumeneko sailburu Arantxa Tapiak ekitaldi publiko hartan.
EMAS sistema Europar Batasunak garatutako kudeaketa-tresna bat da, ingurumena kudeatzeko sistema bat ezarri eta, ikuskaritza independenteen bidez, etengabe hobetzeko konpromisoa hartu duten erakundeak identifikatu eta egiaztatzen dituena.
EMASen erregistratutako erakundeek hitzematen dute beren ingurumen-jokabidea ebaluatu, kudeatu eta hobetuko dutela eta, horrela, erregistratutako erakundeen jarduna, sinesgarritasuna eta gardentasuna hobetzen dira.
% 100 berriztagarria den elektrizitate-horniduraren adjudikazioa
Total Gas y Electricidad España SA enpresari adjudikatu zitzaion bi lineetarako elektrizitate-hornidura. Datozen hiru urteetarako kontratua Bartzelonako metroan (TMB) eta Murtziako Tranbian operatzen duen enpresarekin elkarlanean egindako lizitazioaren emaitza izan zen. 2024 eta 2026 artean hiru garraio-sare horiek urtean 330 GWh inguru kontsumituko dituzte, 40 milioi euro gutxi gorabehera (120 hiru urteetan), gehi konpainia bakoitzak bere hornitzaileari likidatzen dion tarifa arautua.
Energia elektrikoa erabakigarria da edozein trenbide-ustiapenerako, trenen eta beste instalazio askoren funtzionamendua errazten duelako eta, hartara, hornidura horrek gastu-partida nagusien hornitzaile izatea dakarkio. Metro Bilbaoren kasuan ere bai. Kostuak murriztu eta baliabideak optimizatzeko ahaleginen esparruan, batera kontratatzeak baldintza hobeak lortzen laguntzen du. Oraingoan, guztira hamar enpresa gonbidatu ziren lizitazioan parte hartzera; haietatik zazpik aurkeztu zituzten proposamenak. Azkenean Total-en proposamena hautatu zen, merkeena zelako.
Besteak beste, kontratuak zehazten du hornitzen den elektrizitate guztiaren (%100) jatorria berriztagarria izango dela; hiriarteko trenak 2021etik betetzen du helburu hori. Horri esker, bezeroek egiten duten bidaia bakoitzak 0 karbono-dioxido isurtzen du atmosferara eta, ondorioz, Metro Bilbao garraiobide iraunkor gisa sendotzen laguntzen du. Bera izan zen Espainiar Estatuan hori egiaztatzen dion ziurtagiria atera zuen lehen trenbide-enpresa.
